Tapaz, Capiz – Nagpatigayon sang caroling kag pagpanagtag sang regalo ang mga katapo sang Tapaz PNP sa pila ka mga barangay sa banwa sang Tapaz, Capiz. Ginpahayag ni Police Senior Inspector Edwin Luces, hepe sang Tapaz MPS nga magluwas sang ila pagpatigayon sang caroling nagapanghatag man sila sang regalo sa mga tagbalay. Suno diri nga nalagpasan na nila ang target nga 25 ka mga households bangud naglab-ot na sa masobra sa 50 ka mga panimalay ang ila ginpadulungan.
Nahibaluan nga nagsugod pa sang nagligad nga semana ang pagpatigayon sang caroling kag pagpanghatag sang regalo sang mga katapo sang Tapaz PNP sa mga napilian kag pigado nga resipyente.
Gindugang pa ni Luces nga katuyuan sang nasambit nga programa nga maghatag sang kalipay sa mga residente sa sini nga paskwa kag mapalapit sa tawo ang hanay sang kapulisan. Kalakip man diri ang pagpatigayon sang kampanya sa batuk sa iligal nga droga kag anti-criminality campaign.
Ginpasalamatan man ni Police Senior Inspector Edwin Luces ang kooperasyon sang MSWDO kag Municipal Advisory Council sang Tapaz. Ang nasambit nga Christmas Caroling and Gift Giving nga may tema, ‘ Awit at Regalo Alay sa Inyo sa Araw ng Pasko” ang kabahin sang PNP Patrol Plan 2030 & Tapaz MPS Best Practices.
*(photo from pulis tapaz )*
