Ta manda ya el Alcaldeza Maria Isabel “Beng” Climaco Salazar busca con el un mujer quien yan post na Facebook el bendida del un unit de mga casa que entendido para del mga Internally Displace Person (IDP) na lugar affectao del guerra del Septiembre 2013.
Na entrevista del RMN Zamboanga con Roxanne Rojo Pedro, ele ya habla kay el casa ta bende sila pwede incuntra na Bugog Sta. Catalina y este na balor de 350,000 pero pwede pa asigun rebaja na 330,000.
El RMN quien ya pretende como buyer ya cuento-cuento con Pedro donde aqui ya admiti ele que mucho ya del otro mga benefisario el ya bende el diila mga casa tiene ta alcanza pa ba 400,000 el cada unit.
Mas temprano hinde pa ta confirma el National Housing Authority (NHA-9) que ta encabesa si Engr. Al-Kwarismi Indanan que tiene mga IDP’s el ta bende diila mga casa.
Ya pwede sabe e RMN desde con Pedro kay illegal tapping lang el diila curiente.
Este cosa ya llega ya atencion de Alcaldeza Climaco si porque insiguidas ya ordena ele para ase el embuscada con Pedro y pone bajo na investigacion.
