Cash incentives automatic nga madawat sa medalists sa Davao Eagles

Davao City – Motivated ug inspired ang mga atleta sa Davao Eagles sa nagpadayon karon nga Palarong Pambansa 2023 sa Marikina City, diin automatic nga madawat sa mga atleta ang ilang cash incentives oras nga sila makakuha og medalya.

Sa interbyu sa DXDC RMN Davao kang Deony Ferolino, Davao City Division Sports Officer sa Palarong Pambansa 2023, iyang gibutyag nga automatic nga madawat sa gold medalist ang P25,000, samtang P5,000 sa silver medalist, ug P3,000 sa bronze medalist.

As of August 2, 2023, kapin 10 na ang nasakmit nga gold medals sa mga atleta gikan sa Davao Region.

“Inspired kaayo kay nag-nightly awarding ceremony, gipangtagaan gyud og mga incentive tong nakadaog og gold, silver ug bronze (medals). Unyang karong gabii napud, og kinsay nakadaog karong adlawa, mag-award napud. Na-motivate gyud ni sila kay ilang daog per day i-incentivize man dayon,” sulti ni Ferolino.

Padayon nga nanghinaut ang sports officer nga madugangan pa ang medalya sa Davao Eagles ilabi na ang gold medals nga makatabang aron nga musaka ang rank sa grupo gikan sa 11th place niadtong Palarong Pambansa 2019.

Sa pagkakaron, nagpadayon ang mga kompetisyon o aktibidad sa maong multi-sport event nga mahuman sa Agosto 5, 2023.

RadyoMaN Kirby Manzon