Davao City – Magpabiling gidili ang sabong ug casino ilawom sa Alert Level 2 nga maoy Coronavirus Disease 2019 (COVID-19) classification karon sa syudad sa Davao.
Gibutyag ni Davao City Mayor Sara Duterte-Carpio (sa interbyu sa city-owned radio), gitugot na ang tanang events gawas lang sa nahisgutang aktibidad nga nagkinahanglan og permiso o pagtugot sa Inter-Agency Task Force (IATF) o sa national government.
Nagpasidaan usab si Mayor Sara nga bisan og gigutotan na ang mga aktibidad, kini wala nagpasabot nga luwas na kini gikan sa risgo sa takod sa virus, diin padayong giawhag ang publiko sa pagtuman sa minimum public health standards batok COVID-19.
“Allowed na daw tanan per our Prevention and Enforcement group, all events are allowed, except nalang ang sabong and ang casino which needs a permission gikan sa national government. Otherwise, pwede na. Good luck! Mag-remind lang ko. Although it is allowed, it does not necessarily mean that it is safe,” sulti sa mayor.
Samtang, adunay mga aktibidad ang Local Government Unit (LGU) nga gihimo na nga online sama sa Pasko Fiesta ug bisan ang pagpanghatag og Pahalipay sa Pasko o ayuda pinaagi sa SafeDavao QR (DQR) aron malikayan ang panagtapok sa tawo o mass gatherings.
RadyoMaN Kirby Manzon
