Davao City – Walay kwestyon nga suportado sa tawo ang kampanya kontra iligal nga droga sa rehimen ni Pres. Rodrigo Duterte gawas lamang sa gidebatehan gihapon karon nga kamatay sa pipila ka mga nahimong biktima sa maong gubat ilabi na mga kabatan-onan ug mga menor de edad.
Sa interbyu uban ni Institute For Political and Electoral Reforms (IPER) executive director Prof. Ramon Casiple sa ‘Straight to the Point’, gisulti niya nga walay problema kabahin sa anti-drug campaign sa administrasyong Duterte apan adunay panagbangi diha sa taas nga numero sa mga nahimong biktima sa kampanya.
Base sa labing ulahing serye sa mga opinion polling surveys, hati ang opinyon sa katawhan sa war against drugs diin kusog ang ilang pagsuporta sa kampanya apan tino usab ang oposisyon sa uban sa pag-ingon nga dili solusyon ang pagpamatay sa mga suspected drug personalities.
Dugang ni Casiple, angay usab masabtan sa tanan nga aduna gihapoy mga kwestion kung ‘premeditated’ ba or bunga lamang sa pagsukol kun ‘nanlaban’ ang kamatayon sa mga biktima atol sa mga legitimate police operations.
Dugang sa propesor nga angay gayud nga tinoon ang mga kritikal nga panghinaway versus drug war sama sa kalapasan sa tawhanong katungod sa mga na-neutralisa sa mga awtoridad.
Latest police estimates nagbutang sa gidaghanon sa mga napatay nga drug suspects sa police anti-drug operations sa dul-an 4,000 nga gi-alkontra sa mga human rights advocates sa pag-ingon nga molanat na sa 13,000 ang na-likidar sa gyera batok drogas.
RadyoMan Jason Amisola
