Davao City – Magdepende na karon sa assessment sa Armed Forces of the Philippines (AFP) ug sa Philippine National Police (PNP) kung angayan bang i-rekomendar ngadto sa nasudnong gobyerno ang hangyo ni Davao City Mayor Inday Sara Duterte-Carpio nga dili na i-apil sa martial law coverage sa tibuok isla sa Mindanao ang dakbayan sa Davao.
Alang kang Prof. Ramon Casiple,Executive Director sa Institute for Political and Electoral Reforms (IPER), malisod sa karon nga unhan ang militar ug kapulisan sa ilang lantaw sa kahimtang sa seguridad sa Mindanao gumikan sa nagpadayon nga presensiya sa mga terorista nga naglungga sa pipila ka dapit dinhi.
Apan tungod kay daghan na sa mga lugar sa Mindanao sama sa dakbayan sa Dabaw makonsidera nga nagmalinawon na gikan sa pagpangatake sa mga terorista, hayan makonsidera na ang Davao nga dili na apilon diha sa martial law coverage, matud ni Casiple.
Apan dili lamang magkumpiyansa ang militar ug kapulisan nga porke malinawon na ang sitwasyon sanglit daku gihapon ang posibilidad nga muhimo gihapon og kasamok ang mga teroristang hut-ong sama sa Maute group, BIFF, ASG ug CPP-NPA nga padayong naglihuk sa nagkadaiyang parte dinhi.
Nasabtan ni Casiple nga adunay managlahi nga baruganan ang mga negosyante ug uban pang sektor sa katilingban niining balaud-militar diin ang uban mabalaka niini samtang ang uban buot nga wagtangon kini dinhi aron ma-engganyo nato ang mga investors ug turista nga mobisita ug mo-invest dinhing dapita.
RadyoMaN Joel Viray
