Davao City – Makonsidera nang usa ka malamboon nga nasud ang Pilipinas karon tungod sa mga kabag-ohan ug kausaban nga gipatuman sa Duterte administration diin sulod sa kapin tulo ka tuig sa pangatungdanan, dili na malilong ang grabe nga pag-improbar sa ekonomiya ug kalamboan diin mas nakabenepisyo niining tanan mao ang ordinaryong katawhang Pilipino.
Matud ni Institute for Political and Electoral Reforms (IPER) Executive Director Prof. Ramon Casiple nga ang kabag-ohan nga natilawan sa Pilipinas karon bunga sa mga saad ni Pres. Rodrigo Duterte sa miaging 2016 presidential election campaign nga anam-anam nang natuman karon.
Usa sa mga maayong nahitabo sa Pilipinas sa 2019 mao ang pagbalik sa nasud sa iyang maayong reputasyon sa pangkalibutang kumunidad busa subling misalig ang mga langyaw sa pagbubo sa ilang mga puhonan dinhi sa Pilipinas, gani anaa sa ikaduhang puwesto sa entero kalibutan nga paspas ang pagsaka sa ekonomiya.
Kaniadto ang Pilipinas hagsa ang Gross Domestic Product ug taas ang inflation rate, karon lampas 6% na ang GDP ug samtang padayong mikanaug ang inflation rate nga basehan sa epekto sa ekonomikanhong kalihukan, may hatud kini nga negatibong impact ngadto sa mga yanong lungsuranon.
Ang pagtaas sa GDP ug pagkontrolar sa inflation rate nagpa-ubos sa poverty level, naghatag og daghang trabaho kun pag-ubos sa unemployment ug underemployment rate, busa mi-angat ug milambo ang ekonomiya sa nasud sulod sa tulo ka tuig.
Ang pagkapildi sa 12 ka kandidato sa pagka-senador sa Liberal Party (LP) ug pag-dominar sa political arena sa partido ni Duterte maoy pinakanindot nga katikarang natigayon sa tibuok Pilipinas kay makita dinhi ang panaghiusa sa kinabag-ang duot sa katawhan diha sa pagbarog sa politikanhong aspeto sa nasud.
Gumikan sa kadaugan sa administrasyon ug paglampaso sa opposition diha sa political arena sa miaging piniliay, nahimong stable ang politika nga nag-impluwensiya sa perspektibo kun panglantaw sa kinabuhi sa katawhang Pilipino ingon man sa mga langyaw,sumala ni Casiple.
Ang pagsupak ug pagbangga ni Duterte sa Estados Unidos ug sa mga kaalyadong mga oligarchs nagpausab sa pagtoo ug paglantaw sa mga silingang nasud sa Asya nga ang Pilipinas mouthpiece ug nagrepresenta sa Amerika diin napabalik ang national pride sa mga Pilipino gumikan sa liderato sa presidente.
RadyoMaN Joel Viray
