Tatlong indibidwal ang naitalang nasawi at sampu ang sugatan, habang isa ang nawawala sa Region 5, 7, 8 at 11, dahil sa pananalasa ng Bagyong Bising.
Batay ito sa huling situation report ng National Disaster Risk Reduction and Management Council (NDRRMC) as of alas-8:00 kaninang umaga.
Ang dalawang unang iniulat na nasawi ay isang 47 anyos na babae sa Catmon, Cebu na namatay sa matinding injury sa dibdib; at isang 79 na taong gulang na lalaki sa St. Bernard Southern Leyte na namatay sa head injury matapos mabagsakan ng mabigat na bagay.
Samantala, 59,098 na pamilya o 229,829 na indibidual ang iniulat na apektado ng bagyo sa 944 na barangay sa Region 5, 8 at CARAGA.
Sa bilang na ito 3,848 ang inilikas sa 236 evacuation centers; habang 5535 na pamilya ang nakitira sa mga kamag-anak o kaibigan.
Halos 46 na milyong pisong halaga naman ang iniulat na pinsala sa agrikultura at mahigit 10 milyong sa imprastraktura sa Region 5 at 8.
Mahigit isang libong bahay naman ang partially at totally damaged sa Region 5, 8 at CARAGA.
