Wa kapugngi ni Dagupan-Lingayen Archbishop Socrates Villegas nga mahimong emosyonal atol sa wali sa iyang misa alang sa nitaliwan nga si Cebu Archbishop Emeritus Ricardo Cardinal Vidal kagabii sa Cebu Metropolitan Cathedral.
Nanglugmaw ang luha sa presidente sa Catholic Bishops Conference of the Philippines (CBCP) samtang gihulagway niini si Cardinal Vidal nga usa ka “super- extraordinary” nga tawo.
Matud ni Villegas, magbilin ug kahaw-ang sa simbahan ug magtotoo ang pagtaliwan ni Cardinal Vidal ug way makahulip niini .
Bisan ug masulob-on kini , apan sa samang higayon iyang gihuna-huna nga sa kinaiya sa cardinal wa kini laing paingnan sa iyang pagbiya sa kalibutan kung dili ang kiliran sa Diyos .
Di niya malimtan ang mga higayon nga sila nagkauban sa pipila ka mga okasyon ingon man ang mga tambag ni Cardinal Vidal ngadto kaniya .
