Davao City- Nagpost og litrato ang usa ka netizen sa facebook sa dagan sa trapiko sa Panacan area padulong Tibungco ning syudad sa Davao diin nakasinati ang maong lugar og bug-at nga trapiko karong adlawa sugod pa kaganinang buntag hangtod karong gabii.
Sa pakighinabi sa DXDC RMN Davao kang Dispatch Officer sa City Transport and Traffic Management Office kun CTTMO nga si Joel Peñalosa, sumala niya nga hinungdan sa maong trapiko kaganinang buntag mao ang trak nga nadaot tunga-tunga sa dalan sa may Panacan area ug sa nagpadayong construction nga ginahimo sa kadalanan.
Subay usab sa post sa maong netizen nga wala silay nakita nga traffic enforcers sa maong area apan giklaro ni Peñalosa nga dunay mga traffic enforcers ang naka-deploy sa lugar, usa sa may palengke ug usa sa may St. Peter Panacan aron mu-control sa dagan sa trapiko.
Gipasabot ni Peñalosa nga igo-igo ra usab ang mga personahe sa CTTMO nga gipang-deploy sa nagdakaiyang area sa syudad apan og magkinahanglan og dugang enforcer sa usa ka lugar, ginadeploy nila ang uban nga na-assign sa downtown area aron mutabang sa pag-manage sa dagan sa trapiko.
RadyoMaN Renz Barbarona
