Davao City – Gipaniguro sa Davao City Disaster Risk Reduction and Management Office (CDRRMO) nga luwas gihapong magamit ang tulo (3) ka mga Temporary Treatment and Monitoring Facilities (TTMFs) human sa Magnitude 7.1 nga linog ala 1:46 sa kaadlawon niadtong Huwebes (Agosto 12, 2021).
Matud ni CDRRMO chief Alfredo Baloran, nagbaton lamang og minor ug hairline cracks ang tulo ka isolation facilities partikular na ang University of the Philippines (UP) Mintal, Doña Carmen Elementary School, ug A.L. Navarro Elementary and High School, diin wala na usab nagpatuman og evacuation tungod sa pagtay-og.
Segun ni Baloran, insakto usab og training ug orientation ang mga nagdumala sa maong pasilidad kung unsa ang mga angay himuon ug unsaon pag-handle ang mga pasyente ilabi na panahon sa emerhensiya.
Samtang, nasusi usab sa grupo ang estado sa mga government buildings diin giuna kadtong mga gambalay nga kanhi na nagbaton og cracks apan wala kini nadugangan tungod sa kusog nga linog.
RadyoMaN Kirby Manzon
