Davao City – Mapasalamaton gihapon si Davao City Disaster Risk Reduction and Management Office (CDRRMO) nga walay natalang casualty luyo sa dakong baha kagahapong adlawa (Hulyo 9, 2021) partikular na sa Barangay Lasang, Bunawan District ning syudad sa Davao.
Sa interbyu sa DXDC RMN Davao kang Alfredo Baloran, head sa CDRRMO, gibutyag niini nga gawas nga walay casualty, wala usay natalang injured ug missing tungod sa pagtaas sa tubig sa Bunawan river ug creek sa Licanan.
“Kalooy sa Dios walay casualty, wala poy missing, wala poy reported nga injured. Naa ‘tay mga gipang-evacuate nga mga indibidwal affected na sila sa pagdako sa tubig didto sa Bunawan river,” butyag ni Baloran.
Sama usab sa obserbasyon ni Baloran, gibutyag usab ni Kapitan Allan Simo-ag sa Brgy. Lasang nga mas taas ang tubig nga nasinatian kagahapong adlawa kun itandi sa milabay nga mga pagbaha diin kini miresulta sa pagkakulgot sa mga motorista.
“Kung atong ikumpara kaniadto, medyo extraordinary ang pagtaas sa tubig karon. Gani, kahibalo ko nga daghan nga mga residente ang apektado (diin) ang uban atong gihikling karon diri sa atong barangay hall,” sulti ni Simo-ag.
Muabot sa 30 ka pamilya ang temporaryong gihikling sa evacuation center ug gisuplayan sa ilang nag-unang panginahanglan labi na sa ilang pagkaon.
RadyoMaN Kirby Manzon
