CDRRMO: Davao river miabot sa critical level, evacuation gipatuman

Davao City – Nagpatuman og forced evacuation ang Davao City Disaster Risk Reduction and Management Offices (CDRRMO) kagabii (Marso 7, 2022) human nga pipila ka Barangay sa syudad sa Davao nga duol sa Davao River ang nabutang sa Code Red kun Critical Level.

Gilayong gimando ni Alfredo Baloran, hepe sa CDRRMO ang pagpatingog sa siren sa mga barangay nga apektado.

Gipasabot ni Baloran (sa interbyu sa city-owned radio), ilang gipaningkamutan nga makahikling dayon ang mga residente sa evacuation centers aron dili makulgot ugaling mutaas na ang tubig.

“Ang ginapaninguha namo nga kung pwede wala na ‘mi i-rescue pag-abot sa kusog nga tubig. Mas dali ang magpa-evacuate compare sa mag-recue. So, kailangan nato nga mutuman ‘ta kung unsay ginapatuman karon,” sulti ni Baloran.

Sa monitoring sa CDRRMO, miabot sa critical level ang Dominga Creek sa Brgy. Dominga (Davao River Tributary), Brgy. Tamugan, Brgy. Talomo Proper, ug Brgy. Tugbok.

Naobserbahan usab ang pagsaka sa uban pang kasapaan sama sa Brgy. Tigatto, Brgy. Pañalom, Brgy. Fatima ug uban pang river banks.

RadyoMaN Kirby Manzon