CDRRMO-Dipolog mihimo sa pagpangandam batok kalamidad

Zamboanga del Norte – Mihimo sa hinanaling panagtigum ang buhatan sa City Disaster Risk Reduction Management, pinaagi ni Officer-in-charge, Mr. Andrew Saminiano, kaganihang buntag, didto sa City Mayor’s Conference Room, duyog na sa presensiya ni City Mayor Darel Dexter Uy ug sa nagkalain-laing hepe sa mga buhatan ilawom sa kagamhanang lokal ning dakbayan.

Sigun sa nasayran, nga ang pagpahigayon sa maong meeting ang tuyong gihimo alang sa paghisgot sa mga nagkalain-laing lakang nga pagahimoon sa kagamhanang lokal ning dakbayan kalabot na sa presensiya sa bagyong “Vinta”, diin sigun sa pagmonitor sa PAG-ASA, nakitang molabay dinhi sa Zamboanga Peninsula, ug nahilakip ang lalawigan sa Zamboanga Del Norte, diin usab nahimutang ang atong dakbayan.

Atol sa maong meeting nga gidumala ni Mr. Saminiano, dugang nasayran nga sugod karong adlawa, pagahimoon sa mga hingtungdang “Lead Offices” nga gilangkoban sa mga buhatan sa City Social Welfare and Development,City Engineering, CDRRMO, City Health, Bureau of Fire Protection, City Planning and Development Office, City Information Office ug uban pa, ang mga gikinahanglang pagpangandam aron malikayan ang mamahimong kadaut nga idulot ning nasangpit nga bagyo.


Gihisgotan atol sa panagtigum mao ang pag-andam sa mga dagkong sakyanan nga paga-gamiton sa evacuation, mga pagkaon nga i-ayuda alang sa mga mamahimong apektado sa kalamidad partikular na sa baha, pag-ila sa mga evacuation centers dinha sa mga gilantaw nga apektadong barangay sama sa mga Barangay sa San Jose, Turno, Gulayon, Lugdungan, Minaog ug Punta ug Sta. Felomina.

Sigun sa nahimong forecast sa PAG-ASA, ang bagyong VINTA, gibana-banang, sa alas 5:30 sa sayong buntag sa Disyembre 23, 2017(Sabado), kini ang mahimutang 175 kilometros, kasadpang bahin sa Dipolog City.

Alayon ning maong kalamboan, hugtanong nanawagan karon ang CDRRMO ngadto sa tanang mga lomolopyo dinha sa mga kabarangggayan ilabi na kadtong gi-ilang mga “flood-prone” sa paghimo sa hugot nga pagbantay ug pag-monitor ilabi na sa kagabhi-on batok na sa posibleng baha ug landslides, gumikan sa makusog unya nga pag-ulan.

Dugang usab nga gi-awhag ni Saminiano ang mga katawhan nga likayan ang pag-panic, hinoon mohimo sila sa mga tukmang pag-pangandam, sama sa pagkaon, tambal, tubig mainom, flashlights ug uban pa.(CIO)

Facebook Comments