Davao City – Nagpahigayon og preemptive ug forced evacuation ang Davao City Disaster Risk Management Office (CDRRMO) kagabii (October 22, 2021) tungod sa pagtaas sa level sa tubig sa mga kasapaan sa syudad.
Matud ni Alfredo Baloran, hepe sa CDRRMO (sa interbyu sa city-owned radio), ubay-ubay sa mga lugar sa syudad ang gimandoang manghikling kagabii human nga nabutang sa Code Red (Critical Level) ang Aklihan Creek (Tributary sa Talomo River) sa Purok 23, Brgy. Sto. Niño, Tagluno River (tributary sa Lipadas River) sa Brgy. Tagluno, ug Sumimao River (Tributary sa Davao River).
Nabutang usab sa Code Yellow (Alert Level) ang Lipadas River sa Brgy. Lubogan ug Matina River sa Brgy. Matina Pangi, ug uban pang areas nga nakasinati og street flooding.
Panawagan ni Baloran sa publiko ang kanunay nga pag-alerto ilabi na kadtong anaa sa flood-prone, landslide-prone ug low-lying areas nga daling maapektuhan sa mga pag-ulan.
“Kanunay gyud ‘tang magbinantayon kay tungod masinati kining mga pag-ulan dala aning localized thunderstorms tungod kay naa na ‘ta sa La Niña season,” sulti ni Baloran.
Giseguro usab sa CDRRMO nga adunay igong pasilidad o mga evacuation center nga mabutangan sa apektadong mga residente panahon sa kalamidad.
RadyoMaN Kirby Manzon
