CDRRMO: Walay natalang damyos sa pagbaha sa kadalanan ug pagsaka sa level sa tubig sa kasapaan

Davao City – Nakasinati og pagbaha sa kadalanan og pagsaka sa level sa tubig ang kasapaan sa syudad sa Davao nunot sa kusog nga bundak sa ulan niadtong adlaw’ng Sabado, Enero 14, 2023.

Sa interbyu sa DXDC RMN Davao kang City Disaster Risk Reduction Management Office (CDRRMO) Head Alfredo Baloran, gibutyag niya nga walay damyos nga natala subay sa ilang monitoring.

Segun ni Baloran, nakasinati og pagbaha ang CP Garcia, Laverna, Mabini, Bangkal. Niawas usab ang tubig sa creek sa Panacan ug nisaka ang level sa tubig sa Talomo River, Matina River, Suawan River ug Davao River.

Subling nagpahimangno si Baloran sa mga nagpuyo sa landslide prone area ug daplin sa kasapaan nga magma-igmat og mangandam kanunay kung adunay kalit nga pagbaha ug gilayong mobakwit.

“Wala may damage, nakasinati lang og street flooding. Kanunay ‘ta mangandam ilabina sa mga nagpuyo daplin sa kasapaan ug landslide prone area magbantay kanunay,” sulti ni Baloran.

RadyoMaN Don Pulayao