Davao City – Dili na buot makiglantugi ang parish priest sa Sacred Heart of Jesus Parish nga nahimutang sa Obrero ning siyudad sa Dabaw sa hagit ni Pres. Rodrigo Duterte ngadto sa kaparian nga mas maayo magminyo na lang sila kay sa makasala dala sa lawasnong kailibgon mao nga ang ubang miembro sa clergy nakabuhat og pagpangabusong sekswal.
Gibarugan ni Monsignor Paul Cuizon nga dili solusyon ang panawagan ni Duterte nga tugtang magminyo ang mga pari aron dili matintal sa kaibog sanglit ang musulod sa bokasyon.
Matud ni Cuizon nga anaa sa bibliya ang pagtulon-an nga celibacy nga kung kinsa kadtong buot mangalagad sa simbahan gimandoan nga limpyohan una ang kaugalingon aron gawasnon sa kalibutanong tinguha aron walay babag ang ilang pagsulod sa ministry ug kaniadto kini nga reglamento sa Vatican nga gipatuman sa tanang simbahang Katoliko tibuok kalibutan.
Wala gililong sa opisyal sa simbahan ang law-ay nga binuhatan sa ubang pari apan kini dala lang sa sugo sa unod diin walay maayong lalake makaingon nga kaya niya likayan ang tintasyon sa kalibutan kay bisan gani ang magti-ayon mahimong masipyat pa man gani sa ilang kaminyoon kana pa kahang walay mga asawa ug mga bana sama sa clergy community.
RadyoMaN Joel Viray
