Davao City- Nipatim-aw na ang Davao City Environment and National Resources Office (CENRO) representative atol sa regular session karong adlawa sa Sangguniang Panglungsod aron mu-esplikar sa ilang aksyon nga gihimo kalabutan sa ‘leachate spill’ o pagdahili sa duga sa basura gikan sa New Carmen Sanitary Landfill.
Gipasalig sa CENRO pinaagi kang Dolores Remojo, Supervising Environmental Management Specialist sa Environmental Waste Management Division sa CENRO Davao nga ilang sulbaron ang maong problema kutob karong bulan sa Disyembre.
Kahinumduman nga nireklamo ang katawhan sa niawas nga duga sa mga basura gikan sa maong sanitary landfill diin nipadulong kini sa Matina Pangi River ngadto sa dagat.
Samtang gianunsyo ni Sangguniang Panglungsod Majority Floor Leader Bernard Al-ag nga ila nang gi-aprobahan ang budget alang sa rehabilitasyon sa presenteng pasilidad ug ang katukoran sa bag-ong dumpsite mismo.
Matud ni Remojo, sugdan na karong Disyembre ang rehab sa New Carmen Sanitary landfill ug development sa Gatungan, Bunawan District ug laing area nga duol sa New Carmen Sanitary Landfill nga maoy giilang himoong bag-ong dumpsites sa dakbayan.
RadyoMan Aimee Guinita
