Davao City- Gisugyot sa Davao City Disaster Risk Reduction Management Office (CDRRMO) sa City Environment & Natural Resources Office (CENRO) nga susihon ang mga designated garbage collection areas.
Sumala ni Alfredo Baloran, chief sa Davao City Disaster Risk Reduction Management Office (CDRRMO) sa interbyu sa DXDC RMN Davao, girekomendar niini nga siguraduhong dili kini maanod ang mga basura kung mag-ulan samtang wala pa kini makuha sa mga garbage trucks.
Matud ni Baloran, usa kini sa mga hinungdan sa pagbara sa mga drainage system tungod sa basura nga moresulta sa pagbaha.
“Sa pagkakaron naga double time ang atoang Ancillary Services Unit ug ang atoang City Engineers sa paghinlo aning drainage system. During sa Department head meeting na-call pod ang attention ni Engr. Reyes sa CENRO nga strictly i-implement pod ang collection sa atoang mga garbages,” segun niini.
Giawhag usab ni Baloran, ang mga barangay officials nga hugot i-monitor ang ilang mga ginsakpan kung sa mga designated areas gipanglabay ang mga basura ug dili sa kanal.
RadyoMan Aimee Guinita
