Davao City – Bangi sa trabaho ang gitan-aw nga motibo karon sa Island Garden City of Samal (IGaCoS) PNP labot sa pag-ambush patay sa usa ka opisyal sa City Environment and Natural Resources Office (CENRO) alas-12:08 kaganinang udto (July 20, 2020) sa Purok-1B, Barangay Peñaplata, Samal District, IGaCoS.
Naila ang biktima nga si Florente Coronel, 54 anyos, minyo, CENRO employee ug residente sa maong lugar.
Sa interbyu sa DXDC RMN Davao kang Police Corporal John Dalaygon sa IGaCoS PNP, gibutyag niini nga sa ilang pakighinabi sa asawa sa biktima, gi-esplikar niini nga aduna nay mga nakabangi ang iyang bana atol sa iyang pagpanrabaho.
“Didto mi sa pamilya ganina, naa gyoy pinaka grabe niya’ng nakalaban. Sauna, daghan daw na’g na ka bangi. Gikan pa na siya sa (Bureau) of Fisheries human nag CENRO na karon,” saysay ni Dalaygon.
Sa imbestigasyon sa IGaCoS PNP, ayha ang insidente, nagbiyahe ang biktima sakay sa iyang kotse samtang ginasundan kini sa wala mailhing indibidwal sakay sa usa ka van ug duha ka wala mailhing tao sakay sa motorsiklo diin walay plate numbers ang mga sakyanan.
Matud sa police official, padayon karon ang gihimong hot pursuit operation batok sa mga responsable sa krimen.
RadyoMaN Kirby Manzon
