Gikaalarma karon ni Misamis Oriental Gov. Yevgeny Emano ang pagkapusil patay kang Danao, Jasaan chairman Alfredo Zapanta, 53 anyos niadtong Byernes, July 13 sa mga alas 5:15 sa buntag. Usa ka wala nailhang riding in tandem ang mitapos sa kinabuhi sa maong chairman samtang nagbahog kini sa iyang mga baboy. Gilayon mihimo ang gobernador ug Special Investigation Task Force aron mas mapadali ang pagsulbad sa maong pagpamusil.
Naigo sa ulo ug sa lain pang parte sa iyang lawas si Zapanta. Gidala gilayon kini sa ospital apan gideklara ng patay. Samtang nakuha sa mga pulis ang duha ka basiyong bala sa gisuspitsahang .45 caliber pistol sa crime scene. Matud pa ni Chief Inspector Rogelio Labor Jr., wala pa daw nila natino pa ang motibo sa maong pagpatay ug gikonsedira pa nila ang pipila ka mga angulo hilabina gayud ang personal ug politika.
Dugang pa sa kapolisan nga wala na nila gilili ang kaso nga konekted sa druga gumikan kay wala naaapil si Zapanta sa ilang narco list. Wala usab kuno nag-apil apil ang chairman sa illegal drug activities sa ilang lugar. Dugang pa sa ilang nakatap nga impormasyon nga posibleng basi sa taho sa pamilya niini ug mga silingan, sa social media aduna nay nakitang mga post nga may kalambigitan sa politika ang tanan.
Samtang sa laing bahin gikabalaka sa gobernador kining tanan ug nagandam na ug pahalipay nga salapi sa bisan kinsa man nga makahatag ug impormasyon para sa ikasulbad sa maong krimen.
