Sa interbyu sa DXDC RMN Davao kang Dr. Liza Suan, CHED XI Medical and Allied Supervisor, gibutyag niini nga subay sa Department of Health (DOH) Joint Memorandum Circular (JMC) 04 Series of 2021, kinahanglan nga fully vaccinated ang mga estudyante nga musalmot sa in-person learning.
“Ang requirements based sa DOH JMC Series of 2021, kinahanglang fully vaccinated ang (estudyante) sa first ug second dose sa face-to-face. Mao nay naka-state didto sa atoang guideline,” sulti ni Suan.
Matud ni Suan, ang online mode of learning ang mamahimong option sa mga dili bakunado nga estudyante alang sa ilang pagtuon.
Dugang niini, mamahimo usab nga i-require sa eskwelahan ang Reverse transcription polymerase chain reaction (RT-PCR) o antigen negative test alang sa mga dili bakunadong estudyante nga musulod sa eskwelahan.
Gihulat pa usab karon sa CHED-XI kung adunay bag-ong guidelines nga ipagula alang sa in-person learning.
Sa pagkakaron, aduna nay 52 ka mga eskwelahan o colleges ug universities nga nagpahigayon og limited F2F classes sa Davao Region.
RadyoMaN Kirby Manzon
