Davao City – Napasang-at ngadto sa piskalya kagahapong adlawa ang kasong may paglapas sa Republic Act 7610 kun Child Abuse batok sa suspek nga giingong niagni sa duha ka mga batang babaye nga musakay sa iyahang motor ug gidala kini sa kabaybayon sa Barangay Mogbongcogon, Banaybanay, Davao Oriental.
Apan sa interbyu sa RMN Davao kang Banaybanay PNP Station Commander P/Sr. Insp. Eunice Huit nga na-dismiss gihapon ang maong kaso human nga dili na interesadong mupasaka og kaso ang mga biktima ingon man sa nagturn over niini nga Barangay Kapitan nga si Jokarnain Tambuang.
“Na-file namo ang kaso pero eventually na-dismiss gihapon kay lack of evidence against sa suspek kay wala naman nagbalik ang mga complainants,” segun niini.
Gipasabot ni Huit nga bisan pa man nahikay nila ug nakumpleto ang maong affidavit, wala kiniy attachment ug pirma gikan sa mga complainants, rason nga nadismiss kini sa korte.
Kagahapong adlawa usab naghatag na og kamandoan ang korte aron mapagawas si Allan Cagpa, 32 anyos, Criminology student sa Kolehiyo ng Pantukan ug taga-Maragdao, Brgy. Maragatas, Lupon, Davao Oriental kinsa mao ang gireklamo.
Kahinumdoman nga base sa mga testimonyas sa mga batang biktima nga nag-edad og 12 ug 7 anyos atol sa gihimong imbestigasyon sa Women and Children Protection Desks (WCPD) nga didto sa baybay alegasyong gisugo sa maong suspek ang mga biktima nga kuhaan siya’g hulagway samtang nangihi apan tungod sa kahadlok nanagan ug nangayo og tabang ang mga menor.
RadyoMaN Jason Amisola
