Davao City – Gikatakdang mag-montar ang Department of Social Welfare and Development (DSWD) og ginatawag nga ‘child-friendly spaces’ alang sa mga bata nga naapektuhan ang pag eskwela tungod sa linog sa pipila ka areas sa Mindanao.
Sa interbyu sa DXDC RMN Davao kang Erna Sampiano, DSWD XI Disaster Response chief, gibutyag niini nga gi-disenyo ang child-friendly spaces aron mahatagan og psychological intervention ang mga bata sa posibleng trauma nga nasinatian atol sa kusog nga linog.
“Mag put up ta og child-friendly space, mura’g informal nga education. Some sort of therapy, art therapy i-introduce,” saysay ni Sampiano.
Suportado usab sa Department of Education (DepEd) ang maong lakang diin gibutyag sa DXDC RMN Davao ni Jenielito Atillo, spokesperson sa DepEd-XI nga andam nga mutabang ang mga magtutudlo sa mga social workers nga maoy manguna sa pagpahigayon sa maong aktibidad.
Nasayran nga anaa sa 440 ka mga classrooms sa Davao region ang totally damaged human sa sunod-sunod nga pagtay-og.
RadyoMaN Kirby Manzon
