Davao City – Gipaburan sa transport sector nga nakabase sa siyudad sa Dabaw ang gipanday nga Child Safety Restraint System nga balaud sa hawanan sa Kongreso karong panahona.
Sumala sa Board of Trustee Member sa North and South Van Federation nga si Romel Bajador nga makatabang alang sa luwas nga pagbiyahe sa mga pasahero ug labaw na sa mga bata ang Child Safety Restraint System bill nga giduso karon sa kongreso.
Gikanayon ni Bajador nga dugay na adunay balaod ang Pilipinas sa safety belt apan ang kalainan lamang sa gimugna nga balaod karon mao nga kini nakatagana alang sa mga kabataan hilabi na sa gagmay’ng bata.
Ang pagsuot og safety belt sa mga pasahero ma-pampubliko man o pribadong sakyanan makatabang sa hapsay nga pagbiyahe ug layo sa peligro samtang maglawig sa mga kalsada.
Ang luwas nga pagbiyahe magdepende kini sa kung unsa ka disiplinado ang mga drivers sa ilang pagmaneho diin ang propesyonal ug edukado nga motorista una mupadagan sa ilang mga behikulo gipaniguro nga naka-seat belt ang ilang mga pasahero, dugang ni Bajador.
Andam matud pa musunod ug motuman ang ilang grupo ugaling mahingpit nga balaud ang Child Safety Restraint System bisan tuod og gitagana lamang kini sa pribadong mga behikulo sanglit nagahisgot man kini sa kaluwasan sa mga sakay.
RadyoMaN Joel Viray
