Davao City – Angayan ug panahon na nga ma-implementar sa hingpit ang gilagdaan ni Pres. Rodrigo Duterte nga ‘Child Safety in Motor Vehicles Act’ kun Republic Act No. 11229.
Sa interbyu kang Land Transportation Office (LTO-XI) Regional Director Atty.Gomer Dy sa programang ‘Straight to the Point,’ iyang gisugilon nga daku kini’g ikatabang aron maproteksyunan ang mga bata nga sakay sa pribadong mga sakyanan kontra sa mga road crash incidents.
Ubos sa maong balaud, himuon na nga mandatory ang paggamit og child restraint systems sama sa car seats, booster seat ug car bed silbing proteksyon sa mga batang pasahero.
Gidili usab ang paglingkod sa front seat sa mga batang nag-edad og 12 paubos gawas nalang kung anaa na kini sa 59 inches o 4’11 ang height ug makagamit na og regular nga seatbelt.
Matud ni Dy nga nagpadayon pa ang pagpanday karon sa Implementing Rules and Regulations kun IRR sa maong reglamento.
Nagtoo si Dy nga dili man gayod ciento por cientong motuman ang tanan busa aron mamahimo kining epektibo, gikinahanglan gayod ang seryosong pagpanakop sa mga violators.
Multahan ang mga malapasong drayber og P1,000 sa unang opensa, P2,000 sa ikaduhang opensa ug P5,000 ug usa ka tuig nga suspensyon sa driver’s license sa ikatulo ug sa musunod pang paglapas sa maong balaud.
Ang Department of Trade and Industry (DTI) maoy ahensiyang gitahasang moseguro nga ang mga child restraints system mupasar sa safety standards sa United Nations ug usab ang tanang mga manufacturers gikinahanglang mu-comply niini sa hingpit.
RadyoMaN Aimee Guinita
