Davao City – Dili angay kagul-an ang pagdagsa sa mga trabahanteng Intsik dinhi sa nasud kinsa sagad kanila nanarbaho diha sa construction industry.
Gitataw ni Mindanao Development Authority (MinDA) head Adrian Tamayo nga ang balaud sa nasud nag-ingon gayod nga prayoridad ang mga Pilipinong mamumuo apan kadtong dili kayang trabahuon sa mga Pinoy, diha na musulod ang langyawng kahanas partikular na sa teknikal nga aspeto.
“Katong matrabaho sa Pilipino, mao pod ‘to ang trabaho nga kinahanglan ihatag pod sa Pinoy pero katong mga technical ug katong ilahang expertise ihatag pod didto sa mga Tsino,” sumala niini.
Sumala ni Tamayo nga ang panggamhanan nagalantaw alang sa proteksyon sa mga Pinoy workers samtang nakita niini nga oportunidad usab ang pagsulod sa daghang langyawng mga mamumuo.
“Operational ang balaud, operational pud ang atoang pagpaningkamot nga they would come also because they would also spend. If we try to look at it, mugasto pod na sila, mugamit pod na sila og mga boarding houses, mu-renta sila, so it would also constitute income into all our sectors, ” sumala ni Tamayo.
Matud ni Tamayo nga theoretically, kung adunay relasyon ang duha ka mga nasud ug adunay mga proyektong istoryahan, sagad ang ilahang mga experts mao pod ang ilahang gamiton o pahimuslan.
RadyoMaN Aimee Guinita
