Davao City – Gipahimangnoan karon sa Davao City Health Office (CHO) ang tanan nga likayan mokanaog sa mga bahaanan nga lugar karong ting-ulan aron makalikay sa ‘leptospirosis’ o sakit nga makuha gikan sa ihi sa mga ilaga nga musagol sa baha.
Giawhag ni CHO head Dra. Josephine Villafuerte nga katong mga tawo nga na-expose sa baha sa ilang mga lugar moduol gilayon sa health center sa ilang mga barangay aron matagaan og ‘prophylaxis’.
Gibutyag ni Villafuerte nga aduna nay duha ka tawo ang namatay dinhi sa syudad tungod sa leptospirosis.
Ang mga biktima nag edad og 35 anyos nga taga Maa ug ang usa nag edad og 19 anyos nga residente sa Barangay Panaga Sitio Monteflor, Paquibato District ning syudad.
Samtang nisaka na ngadto sa 46 ka kaso sa leptospirosis ang natala sa CHO.
Matud ni Villafuerte nga padayon ang ilang gihimong monitoring ngadto sa mga pasyente nga anaa na sa ilang mga panimalay.
Gibutyag niini nga sagad sa mga biktima wala giinom ang mga medisina nga gihatag kanila.
Ang Buhangin adunay 14 ka kaso diin sila maoy adunay pinakataas ang ihap sa leptospirosis cases, nisunod usab ang Bankerohan, Ulas o Magtuod, Marilog, Catalunan Grande, Paquibato, Bunawan ug Talomo South.
RadyoMaN Aimee Guinita
