Davao City – Nakatala karon ang City Health Office (CHO) og taas nga kaso sa dengue sa syudad sa Davao.
Sa interbyu sa DXDC RMN Davao kang Cherrie Cavan sa Tropical Disease Prevention and Control Unit sa CHO, gibutyag niini nga natala ang anaa sa 275 dengue cases sa June 2021 diin gikaupat og pilo ang 67 cases sa susamang bulan sa milabay nga tuig, 2020.
Sa datus nga gipadala sa CHO sa DXDC RMN Davao, sa bulan sa Hunyo karong tuiga, nanguna sa listahan sa pinakadaghang dengue cases ang Talomo Poblacion nga adunay 22 ka kaso.
Gisundan sa Sasa nga adunay 15, Panacan (12), Maa (11), Tibungco (10), Calinan Poblacion (8 ), Bunawan (6), Matina Crossing (6), Mintal (6) Catalunan Grande (5), Daliao (4), Tigatto (4), Cabantian (4), ug Wilfredo Aquino (3) samtang ang ubang barangay nakatala og tag-usa ka kaso.
Padayon karon ang information drive campaign sa CHO ug panawagan sa Davaoeños nga mahimong alerto batok sa dengue ug batasanon ang pagpanglimpyo sa mga lugar sa panimalay aron malikayan ang maong balatian labi na panahon sa ting-ulan.
“Naga clean up drive ‘ta. Naa ‘tay surveillance unya naga adto atong tropical team didto sa areas kung asa ang affected sa dengue,” sulti ni Cavan.
RadyoMaN Kirby Manzon
