Davao City – Gipahimangnuan sa City Health Office ang publiko nga suwetuhon gayod og tarong ang muhimo sa ilang mga dental procedures kung lisensyado ba kini ug aduna kiniy mga saktong sanitation sa ilang mga instrumento aron makalikay sa mga blood-borne diseases nga makuha sama sa HIV, Tuberculosis ug Hepatitis.
Sa interbyu sa DXDC RMN Davao kang Assistant City Health Officer Dra. Marjorie Culas nga kinahanglang mag-igmat ang mga dental patients niining mga giingong mga pekeng dentista.
“Kung naa tay mga mahibaw-an nga mga nagahatag og serbisyo nga walay silay katungod because they are unlicensed kinahanglan i-report gyod nato kay kung dili man gud ta magpakabana dili gayod ni masolbad nga problema and we will put the lives of our people in danger ilabina gyod kung mild lang ang epekto pero ang lisod pa gyod nga mamatay, kanang ulahi na ang tanan ug ulahi na ta magreklamo kung aduna nay madisgrasya,” sumala ni Culas.
Sumala ni Culas nga mamahimong arestuhon gayod ang mga bogus nga mga dental practitioners kung mapamatud-an man gayod kini ug kung adunay insaktong ebidensiya.
“Kung naa may naga-practice diha nga iligal, mga nagpakaaron-ingnon nga sila dentista ug wala diay silay license pwedi mana sila ipadakop kay bawal man mag-practice without license,” sumala ni Culas.
Gidasig niini ang katawhan nga kung aduna man silay mahibaw-an nga pekeng mga dentista isumbong kini sa ilang buhatan aron ilang mahatagan og aksyon ug ilang maimbestigahan.
“Kinahanglan gyod nga abtik gyod kita sa paghatag sa report kay aron masusi pod nato kay kinahanglan man pod nato nga i-validate pod kung kini ba gyod sila naga-practice nga walay lisensya and we will not know because dili man gyod daghan ang naa sa gobyerno ug pipila ra ta pero kung magtinabangay tanan kining gitawag nato ning primary health care approach nga ‘health in the hands of the people,’ dili lang ang gobyerno ang muadto sa balay-balay kon dili ang mga tagbalay pod mu-identify pod sila sa problema ug isulti pod nila sa gobyerno,” matud ni Culas.
Tambag ni Culas sa mga dental patients nga dili maikog nga mangutana kung lisensyado ba ang ilang mga dentista ug ila-ilahon gayod kini una pa man mupailawom sa mga procedures alang sa ilang mga safety.
RadyoMaN Aimee Guinita
