Davao City – Dili angay mo-kumpyansa ang syudad sa Davao labot sa pagdeklara sa Department of Health (DOH) og measles outbreak sa kaulohan partikular na sa Metro Manila ug Central Luzon.
Kini ang pahimangno ni City Health Office (CHO) head Dr. Josephine Villafuerte sa pakighinabi sa DXDC RMN Davao diin gisadig niini kadtong wala pa na immunize batok sa tipdas nga magpabakuna na sa mga duol nga health centers.
Gipasabot ni Villafuerte nga usa ka viral infection ang tipdas diin simtomas niini mao ang taas nga kalintura, pagbaton og red spots sa lawas, pagpamula sa mata, pagkalibanga ingon man pagbaton og ubo, diin mamahimo usab kining musangpot sa kamatayon.
Gibutyag sa CHO head nga sa ilang datos, ubay-ubay na ka kaso sa tipdas ang natala sa syudad. Gani, nagabaton usab og measles outbreak ang Davao sa milabay nga tuig, diin gawas sa mga bata, aduna usay mga batan-on nga nabiktima sa tipdas diin sila usab ang sagad makapakatag sa makatakod nga balatian tungod kay maka lakaw-lakaw man kini sa publiko.
Busa aron kini kalikayan, gilayon nga magpabakuna sa duol nga mga health centers diin adunay gitanyag nga libreng anti-measles vaccine alang niini.
RadyoMaN Kirby Manzon
