Sa pakighinabi sa DXDC RMN Davao kang CHO Spokesperson Daryl Guevara atol sa Serbisyong Straight to the Point kauban si RadyoMan Renz Barbarona, gibutyag niya nga aduna na sila’y natala nga 12 ka mga kasong namatay tungod sa maong sakit sagad mga bata nag edad 5 ngadto sa 9 anyos, gisundan sa nag edad 1 ngadto sa 4 anyos, ug 10 ngadto sa 14 anyos.
Namatikdan sa ilang buhatan nga mas nisaka pa ngadto sa 3,942 ang kaso karong tuiga gikan Enero 1 hangtod Agosto 5 nga mas taas pa kaysa sa nakalabay nga tuig sa samang mga bulan.
Dugang niya nga ang nakita nilang nag-unang rason sa pagkuyanap sa dengue mao ang mas nagkadaghan nga mga breeding habitats sama sa mga kaang, bukong sa lubi, mga container, mga tanom, tansan, ug ginagmay nga mga tulo sa tubig nga pwedeng pundohan sa mga lamok.
”Dengue is a social concern. Meaning, kita, ang matag usa kanato, bawat indibidwal, institusyon, bawat ahensya mapa gobyerno man o pribado, adunay dakong responsibilidad ug kontribusyon sa pagpakgang ug pag kontrol niini,” matud pa ni Guevara.
Panawagan karon sa CHO nga tabangan nato ang atong syudad sa pagpaningkamot aron sa hingpit makab-ot ang limpyong palibot ug layo sa kadaot nga dala sa dengue.
RadyoMaN Ivy Parido
