Davao City – Maayo ang resulta sa unang round sa polio vaccination campaign sa gobyerno gumikan aktibong mipartisipar ang daghanang mga ginikanan nga adunay anak lima ka tuig paubos.
Sumala ni Dra.Julinda Acosta, City Health Office (CHO) Technical Division Chief, kapin 90% ang nabakunahan sa unang hugna dinhi sa syudad sa Davao.
Matud ni Acosta, target nila ang ciento por cientong coverage sa ikaduha ug ikatulong hugna pinaagi sa pagdugang sa mga vaccination sites sa mga public ug private schools, malls ug mga dagkung hospital diin himoon ang pagbakuna matag adlaw sugod November 25 hangtod December 7, ning tuiga.
Samtang gipahibalo usab ni Acosta ang tanan nga dunay pagbakuna sa nagkadaiyang malls sa adlaw’ng Sabado ug Domingo.
Giklaro usab ni Acosta nga gamay lamang kaayo ang wala nagpabakuna karon kung itandi kaniadtong kampanya kontra tipdas tungod sa kahadlok sa Dengvaxia issue.
Tungod niini, nanawagan usab ang CHO sa mga ginikanan nga kompletuhon gayud ang tulo ka round sa pagpabakuna sa ilang mga anak aron hingpit ang benepisyo-medikal nga makuha sa mga bata.
RadyoMaN Bernard Pantallon
