Davao City – Gi-awhag karon sa Davao City Health Office (CHO) ang katawhan kun ang mga Dabawenyo nga dili magpanic luyo sa nadugang nga kaso sa corona virus disease kun COVID-19 sa Pilipinas.
Kini human gikumpirma sa Department of Health (DOH) nga dunay bag-ong duha ka kaso sa COVID-19 ang ilang natala human nagpositibo sa virus ang 48 anyos ug 62 anyos nga mga lalake sa kaulohan.
Matud ni CHO Head Dra. Josephine Villafuerte, hugot ang ilang monitoring ug preparasyon sa pagkontra sa COVID-19 ug gani kanunay sab ang ilang koordinasyon sa ubang ahensiya sa gobyerno sama sa DOH.
Suma ni Villafuerte, inay nga magpanic mas maayo tumanon ang pahimangno sa DOH aron ang virus dili makasulod sa lawas ug matakdan sa maong sakit nga sa karon nakasulodd sa 85 ka nasud sa kalibutan.
Mas epektibo nga pampatay sa COVID-19 ang personal hygiene sama sa paghugas og kamot, dili mag-hawid sa ilong ug baba maingon man ang tibuok lawas nga posibleng entry point sa virus.
Makatabang ang lig-on nga immune system sa pagprotekta sa kaugalingon sa COVID-19 pinaagi sa pagka-on og gulay, prutas, ug pagtumar sa vitamin-c, pag-inom og tubig, ug pagtulog sa saktong oras.
Apan kung ugali makasinati og sintomas sa maong sakit dili na maglangay ug insegida dayon magpakonsulta sa doktor ug angay sab likayan sa ang pagsuroy sa mga matawong lugar sama sa mall.
RadyoMaN Joel Viray
