Davao City – Pangunahan sa City Health Office (CHO) ang ipahigayong Sabayang 4 o’clock habit activity karong adlawa, Agosto 8, 2019.
Sa interbyu sa DXDC RMN Davao kang Elizabeth Banzon, ang Division head sa Tropical ug Nutrition Division sa CHO-Davao City, gibutyag niini nga ipahigayon kini alas-3 sa hapon karong adlawa sa Matina Crossing, Davao City.
Segun ni Banzon nga abri ang aktibidad alang sa kasikbit nga mga lugar alang sa maong hiniusang pagpangita ug pagsumpo sa posibleng puy-an sa mga lamok.
“Kadtong mga neighboring barangays magpadayon mo sa inyong mga activities. Kadtong gusto muadto, pwede pud kaayo. Pagtan-aw ninyo nga 4 o’clock na, tan-awon gyud nato atong mga lugar. Dapat wala gyud tay mga breeding container,” saysay ni Banzon.
Nagpasalamat usab ang opisyal sa DXDC RMN Davao sa pagsuporta sa ilang buhatan nga mamahimong instrumento sa pagpakaylap sa balita ug mga impormasyon nga angayng masayran sa katawhan.
“Salamat sa DXDC, sa inyong suporta sa City Health ug Tropical Unit, sa maong mga buhatan,” pagpasalamat niini.
RadyoMaN Kirby Manzon
