Davao City – Nagpahimangno ang City Health Office (CHO) sa katawhan nga mag-amping sa sakit nga leptospirosis labi na panahon sa ting-ulan.
Sa pakighinabi sa DXDC RMN Davao kang CHO head Dra. Josephine Villafuerte, gipasabot niini nga naggikan ang leptospirosis sa ihi ug hugaw sa ilaga nga adunay sakit busa kinahanglang likayan ang pagtunob sa mga hugaw nga tubig sama sa tubig baha labi na kung nagbaton ang usa ka tawo ug samad.
“Kinahanglan sa ting-ulan kung naa tay samad dili ta maglusob sa tubig. Kay ang leptospirosis pwede sya magsulod sa panit,” saysay ni Villafuerte.
Nagpahimangno usab si Villafuerte sa mga bag-ong nagpa manicure o nagpa pedicure nga likayan ang paglusob sa tubig tungod kay “open wounds” kini nga posibleng maapektuhan sa leptospirosis.
Tambag sa CHO head nga kung aksidente mang nakatunob sa tubig ug adunay samad, gilayong muadto sa health center ug mangayo’g tambal aron malikayan ang maong balatian.
RadyoMaN Kirby Manzon
