Davao City – Nagmaya karon sa kalipay ang pamilya ni Mary Grace Gilvero o Princess Grace human nga nipatim-aw kini kagahapon sa hapon.
Kini ang gikumpirma ni Marilyn Gilvero, taga Prk. Malantawon, Brgy. Lawigan, Mati City, Davao Oriental, ang inahan ni Grace pinaagi sa telepono nga dakong buhi si Grace ug bag-uhay lang nanganak.
Sa pakighinabi sa RMN Team kang Grace, mapasalamaton kini sa iyang mga higala nga mitabang og pagpaabot sa panawagan sa iyang pamilya.
Kahinumdoman nga kaniadtong Agosto 4, adlawng Sabado, midangop si Marilyn Gilvero sa sibyahanan sa DXDC RMN Davao aron ipanawagan ang iyang anak nga si Mary Grace Diaz Gilvero kinsa dugay na sila nga walay impormasyon o balita sukad pa niadtong Enero 2018.
Si Marilyn Gilvero nabalaka human nga iyang nadungog ang balita nga adunay babaye’ng gi-chop-chop nga napalgan sa Cabantian, Buhangin district sa miaging mga adlaw.
Gumikan sa gibating kabalaka nga basin si Princess Grace ang ‘chop-chop lady’ victim gilayon nagpatabang ang inahan sa mga mga kahigalaan dinhi sa dakbayan.
Gani gisabayan kini sa atong reportorial team didto sa Angel Funeral Homes kun asa gipahiluna ang patay’ng lawas aron kumpirmahon.
Tungod dili na ma-hitsura ang nawng sa gi-chop chop nga lawas, nag-suggest ang Crime Lab sa SOCO nga magsumite kini (Marilyn) og sample alang sa DNA testing.
Apan gahapon hingpit na nga naka-uli na si Mary Grace sa ilang panimalay.
Samtang gikumpirma sa Buhangin PNP na sa karon, unidentified gihapon ang chop chop nga lawas sa babaye kinsa napalgan sa dalang Buhangin ug Bajada ning syudad.
Sa pakighinabi sa DXDC RMN Davao kang Buhangin Chief of Police Police Chief Inspector Jack Tilcag, sumala niya nga niabot na sa upat ang misuta sa maong lawas apan negatibo kini.
Padayong panawagan sa Buhangin PNP ngadto sa publiko nga og adunay mahibal-an nga missing makig-alayon gilayon sa kapulisan.
RadyoMaN Aimee Gunita / RadyoMaN Renz Barbarona
