Davao City – Gimanduan ni Davao City Police Office Director PSSUPT. Alexander Tagum ang tanang station commanders nga magtinabangay karon sa pagsulbad sa kaso sa brutal nga pagpatay sa usa ka babae kinsa napalgan ang putol-putol niini nga lawas sulod sa usa ka basurahan sa Cabantian Road, Buhangin, Davao City.
“I have given directive sa akong mga tao nga check all CCTV cameras sa palibot para ma-identify kinsa ni sila nga naghulog sa luoy nga babae and also mas padak-an namo ang investigation not on Buhangin but also Talomo, San Pedro and Sta. Ana areas to determine kung kinsa ning nagpaluyo sa pagpatay sa biktima,” matud ni Tagum atol sa interbyu sa DXDC RMN Davao.
Sumala ni Tagum lakip sa ilang imbestigasyon kung aduna ba kiniy koneksyon ngadto usab sa mga nakaplagang putol-putol nga mga lawas sa usa ka lalaki ug usa usab ka babae sa IGACOS kinsa nagpabilin pa gihapon karon nga mga unidentified.
“Basin involved ni siya o usa ka grupo ni kay naay part man gud sa babae nga wala pa na-recover sa karon nga ginatuohan namo nga basi’g nakuha, hulat lang ta sa effort sa investigation ug dili usa ta mag-speculate para mahibaw-an nato kung unsa ba gyod ang nagpaluyo aning pagkahitabong pagpatay sa babae,” sumala ni Tagum.
Tutukan karon sa DCPO ang maong nahitabong mangilngig nga krimen.
“Kung mahibaw-an nato ni na this is part of a series of murder incidents pwedi siguro nato i-recommend nga magtukod og Task Force but sa karon naga-conduct pa mi’g investigation hopefully makakuha ta’g break,” matud ni Tagum.
RadyoMaN Aimee Guinita
