Davao City – Gitumbok karon sa mga nagpakabanang lungsuranon ang namatikdang kapakyas sa kagamhanan nga ipatuman ang tanang lagda sa Comprehensive Zoning Ordinance (2013-2022) nga maoy nag-unang rason nganong kanunay magbaha dinhi sa syudad sa Davao.
Sa pakighinabi sa ‘RMN Straight to the Point’ kuyog ni Kasamang June Duterte, gisugilon ni Dr. Adrian Tamayo, Director sa University of Mindanao Institute of Popular Opinion (UM-IPO), ang lu-ag nga implementasyon sa mga balaod maoy hinungdan kung nganong dunay pipila ka mga lugar sa dakbayan ciertong makasinati sa pagbaha.
Dugang sa propesor, klaro nga aduna gayuy kakulang sa pagpakabana sa matag usa kabahin sa mga kalamidad nga nagapanghitabo luyo sa gilusad nga mga disaster resiliency actions sa gobyerno susama sa earthquake drills ug uban pa.
Giklaro usab ni Tamayo nga nahimo nang kostumbre sa mga Pilipino nga kung dili kita ang naapektohan sa kalamidad, dili mangilabot ug magsalig nga dunay ihatag nga hinabang.
Apan sahi ra ang gibarugan sa City Planning and Development office ning dakbayan, Gibasol niini ang pagdako sa populasyon sa nasinatian nga pagbaha matag bundak sa uwan sa syudad sa Dabaw.
Sumala ni City Planning and Development Office (CPDO) Chief and Acting Zoning Administrator Roy Ryan Rigor, ang paglobo sa populasyon ang nag-unang hinungdan sa paglunop sa pipila ka parte ning syudad.
Dugang pa niya, napatuman sa sakto ang Zoning Ordinance apan ang problema daghan ang wala nagsubay ug daghan ang nagasupak sa balaud diin hugot gidili ang pag-okupar sa mga open canal sa laing katuyuan hinungdan sa tumang pagbaha.
Dugang ni Rigor, adunay mga kanal nga gipatungan na og mga istruktura sama sa tindahan rason nga naglisod og limpyo ang mga ginsakpan sa drainage unit sa mga baradong canal systems.
Pipila ka mga area dinhi sa syudad gitumbok nga ehemplo sa daw nasikwate nga implementasyon sa atong ordinansa sa zoning sama sa natanggong karon nga katukoran sa usa ka dakong mall sa Mintal area, ang Gaisano Mall diin wala matugti nga buksan sa katarongan nga kini nakalapas sa mga rekwisitos sa zoning ug sa National Building Code.
Mismong si Barangay Captain Cristito Lazaro sa Barangay Bago Aplaya nikumpirma nga ang naasoyng proyekto una nang gi-alkontra sa City Development Council (CDC) gumikan sa kalapasan sa pertinenteng mga balaud sa zoning.
Lain pang katukoran nga gihulagway nga ehemplo sa ‘chopsuey zoning’ mao ang katukoran sa SM Premier Lanang diin grabeng kadismaya gibati karon sa mga residente sa silingang residential area nga Barangay Ubalde sa Agdao nga sayon ra kaaayong bahaan sa tubig naggikan sa area sa maong establisimiento-komersyal.
Lain pang gi-kwestion sa mga lungsuranon mao ang katukoran sa lain pang mall sa may Boulevard area, ang Felcris Centrale nga nagbarug sa usaka dapit nga katunggan ug tubig-tubigan kaniadto.
Kahinumdoman nga sa nanglabay’ng katuigan, nahimong issue usab ang katukoran sa mga low-cost housing subdivisions sama sa NHA Bangkal diin sayon ra kaayong mabahaan sanglit nagtindog kini sa mga dapit nga kaniadto katunggan, duol sa Bucana sa kadagatan or naglatas sa mga ‘natural creeks and waterways’ apan daling napapas sa dihang gitugtang tukoran sa mga pabalay.
Kasamang June Duterte
