Davao City – Magpahigayon og imbestigasyon ang Commission on Human Rights sa nahitabong pagpusil-patay kang rape-slay suspect James Narte ganinang buntag sa Talomo Police Station human kini giingong nangilog og pusil.
Sa interview sa DXDC RMN Davao kang Atty. John Sanchez sa CHR Davao, miingon kini nga sa pagkakaron anaa na sa crime scene ang CHR Davao alang sa pagsusi kung adunay kalapasan sa nahitabong insidente.
Hinuon gitino ni Sanchez nga aduna kini investigation team nga nag imbestigar ngadto sa pamilya sa 16 anyos nga biktima sa rape ug aduna usab kini lahing investigation team alang sa nahitabong pag pusil-patay kang Narte.
“Whether naa bay sad-an o sakto ba ang giingon sa pulis ato pa na siyang imbestigahan” segun niini.
Andam usab ang CHR nga tabangan ang pamilya sa suspek kung buot niini imbestigahan ang nahitabong pagpusil kang Narte.
“Although suspek siya kung tinuod man nga gi-rape niya or dili, dili na mag matter kay miski suspetsado mo, criminal man o dili naa gihapon na silay tawhanong katungod so kailangan gihapon nato na i-respeto”.
Giingon usab ni Chief Investigator Joy Bravo nga sundon sa CHR ang due process sa balaod gani ilang imbestigahan ang pamilya sa suspek ug ang pulis nga mipusil kang Narte.
RadyoMaN Abi Bibera
