Davao City – Matag Pasko, gawas sa pagpalit og mga regalo ug pagkaon dili mawala sa mga Pinoy ang laag. Dili lamang basta-basta nga laag ha apan kauban ang pamilya, barkada ug uban pang minahal sa kinabuhi aron makapahulagway lamang sa nagkadaiyang atraksyon sa Pasko.
Karong tuiga, tema sa lokal nga panggamhanan sa Davao ang ‘Santa’s Toy Factory’ diin ang City Hall napuno og mga disenyo sa mga dulaan aron malingaw ang mga bata – gani sa kadalanan pa lamang matag gabii, makita na ang dagku ug hayag nga mga Christmas decorations sa national highways.
Ingon man ang mga Barangay Halls nga kanya-kanya og disenyo sa gawas sa ilang mga gambalay.
Speaking of barangays, all-out ang ilang mga Christmas lanterns nga nahimutang sa Botanical Garden sa Marfori Heights – gama sa managlahing recyclable materials, native materials inubanan sa light ug nagkadaiyang shape and sizes.
Kung ang Tagum City adunay pinakataas nga Christmas Tree sa tibuok Pilipinas nga dunay gitas-on nga 193 feet, gilusad usab karong tuiga ang pinakaunang iconic ‘3D Christmas Tree’ sa dalang Bajada ning atong syudad diin dungan usab ang Christmas music sa presentasyon niini.
Sama sa fairy tales nga tuyo-onon ang lugar sa mga castle, dunay ‘Christmas Mansion’ sa syudad sa Davao nga nahimutang sa may Roseville Subdivision sa Mamay Road, ning dakbayan.
Napuno usab kini og stuffed toys sama sa Stitch ug Pink Panther nga malingaw gayud ang mga bata ug maka selfie uban ang mga barkada ug pamilya.
Dili usab gayud mawala ang miniatures sa ‘Christmas Village’ diin kini napuno og snow. Gani karong tuiga, aduna silay pakulo nga snow sa gawas mismo sa mansion.
Samtang kung duol lamang usab sa sentro ang gusto ninyong laagan, nindot ang disenyo sa ‘Damosa IT Park’ diin napuno kini og colorful umbrellas nga nagbitay ug gipalibotan og Christmas lights – sakto kaayo pang bonding with your family sama na lamang sa pamilya Miñoza nga matag tuig, mohapit gayud dinhi kauban ang ilang mga chikiting.
“Mas modern sya ug mura ka’g naa sa lain lugar,” segun ni Irish Miñoza nga taga La Verna Hills.
Pinasahing atraksyon usab ang naka montar sa R. Castillo Agdao ang giandam sa ‘Techno Trade Resources Inc.’ diin karong tuiga inspired ang ilang mga disenyo sa cartoon characters sama ni Thomas the Train, Herbie, Toothless sa How to Train Your Dragon, Star Wars spacecraft ug uban pa.
Take note, libre kini ha sama sa libreng magpahulagway sa mga standees nila ni Pres. Rodrigo Duterte, Sen. Bong Go ug Davao City Mayor Sara Duterte-Carpio.
Pipila lamang kini sa mga mamahimo ninyong laagan karong Pasko apan kung walay ‘datung’, okay ra kaayong suroyon ang nagkadaiyang Christmas decorations sa inyong mga silingan pero mas maayo kung kauban nimo ang imong pamilya ug mga minahal sa kinabuhi karong kapaskuhan.
RadyoMaN Jason Amisola
