Davao City – Ang Pasko giila nga maoy pagkatawo sa manunubos sa kalibutan didto sa usa ka pasungan sa Bethlehem. Daghang matang sa pagsaulog sa natawhan sa Ginoo diin usa na niini ang Christmas Carol nga giilang “NOEL” sa nasud Francia nga buot pasabot *‘Christmas is a carol (kanta/awit)’* nga ginahimo panahon sa pasko. Gani usa niini nga gihimong kanta ang nag-ulohan og “First Noel”.
Mabati ang nagkadaiyang awit sa Pasko dili lamang diha sa radyo apan sa pagpanaygon sama sa ‘Joy to the World’ nga maoy kasagaran mabati sa ipahigayong panaygon aron ipaabot ang mensahe nga magsadya kita tungod kay natawo na ang manluluwas sa kalibutan. Gina-awit usab sa mga caroling ang ‘Jingle Bells’, ‘White Christmas’, ‘Oh Holy Night’, ‘Silent Night’ ug uban pa.
Diri usab sa Pilipinas mabati nato ang nagkadaiyang awit nga tagalog sama sa ‘Pasko na naman’ ingon man ang ‘Sa May Bahay’. Pipila lamang kini sa mga Christmas carols nga atong madungog ning panahon sa Pasko kansang tumong niini mao ang pagmaya kay natawo na ang anak sa Dios.
Sa pikas bahin aduna pu’y mga binisaya nga mga awit sa pasko sama na lamang sa ‘Kasadya ning taknaa’ ug duna pu’y gipahaum nga awit alang usab sa mga anaa sa bilanggoan kansang tumong aron wab-on ang pagdumot.
Mga kasama, ang tinuod nga diwa sa Pasko mao ang kanunay nga paghigugmaay, pagpinasayloay ug paghinatagay dili lamang karong panahona kundi sa tanang panahon tungod kay nagpakatawo ang Ginoo aron luwason kita sa mga sala. Kining mga awit sa Pasko usa lamang ka pasidaan sa tanan aron kanunay’ng handumon dili lamang karong Pasko.
RadyoMaN Bernard Pantallon
