TACLOBAN CITY – Magkakamayada delay han pagpadara hin christmas packages dinhi ha Pilipinas pati na liwat an pagpadara tikang ha iba nga nasud ini an ginpahimatngon han Philippine Postal Corporation o kun PhilPost.
Sumala han PhilPost, durot han peak season in madedelay yana nga mga bulan tubtob Pebrebro an mga padara ha iba nga nasud ngan ha Pilipinas.
Sidngon han mao nga ahensya, maagi pa ini ha iba-iba nga departamento ngan limitado an pagpasakay hini ha eroplano sanglit malalangan an mao nga mga padara.
Magdudurot gihapon hin ka-delay pag umagi na ha checkpoint ilabi na an mga igindidiri nga sulod han packages sugad han liquid, baterya, gadgets ngan iba pa nga igindidiri ha sakob hiton eroplano.
Abiso han PhilPost nga magpadara na yana pala ngan diri na paabuton pa ha Desyembre para makaabot ini ha nakatalaan nga adlaw nga pagkarawat han ira mahal ha kinabuhi.
