Davao City – Gi-angkon karon ni Davao City First District Councilor Nilo Abellera Jr. nga karaan na kaayo ang istruktura sa City Hall ning dakbayan ug delikado na kini sa sunog.
Aminado si Abellera nga dili na maayo ang gambalay sa City Hall gumikan sa kadaanan na niini ug kuyaw na kun dunay mag-ulbo nga sunog sa bisan asa nga buhatan sa maong gambalay.
Apan dili pabor ang konsehal nga gub-on ang City Hall kay dinha nakalatid ang dekada na nga landmark sa mga Dabawenyo nga basta gani sa Dabaw ang dali ra matultulan mao ang City Hall.
Giuyunan sa lokal nga magbabalaud ang plano ni Mayor Inday Sarah Duterte-Carpio nga inay gub-on ipa -renovate ug palig-onon na lang ang City Hall.
Giklaro ni Abellera nga adunay pagtagad ug pagpakabana ang City Council ug ang lokal nga kagamhanan mahitungod sa kagabok sa istruktura sa City Hall.
Gani pruweba niini mao nga ang atong kagamhanan sa siyudad naggahin og pondo pinaagi sa pag-apruba sa konseho sa pondo nga gikinahanglan sa renobasyon ug pagpalig-on sa gambalay.
Gumikan sa kadaan, delikado na sa mga tawo nga nagadalikyat ug regular gaadto sa mga opisina sa City Hall ugali mag-ulbo ang dakong sunog.
Alang ni Councilor Abellera Jr. mao na kini ang tukmang panahon aron ma-renovate ug palig-onon ang pondasyon sa tibuok gambalay sa city hall ning dakbayan.
Dugang pagpasabot ni Councilor Abellera nga dili sayon ang pagpatumpag sa City Hall tungod kay nanginahanglan pa kini og makuti nga pagtuon una pa man magpatuman og bisan unsa nga kalamboan sa istraktura sa syudad.
RadyoMaN Joel Viray
