General Santos City— Gihagit ni GenSan City Councilor Atty. Dominador Lagare Jr. si Atty. Arman Clarin, City Legal Officer nga mukanaug na sa pwesto human ang gihimo niining expose sa hawanan sa konseho.
Sumala kang Kagawad Lagare nga dihang nagpahigayon ug panagpulong ang kumpanya sa Star 8 uban ang mga Lokal nga Panggamahanan sa manglahing parte sa nasud sa syudad sa davao, nahimong representante sa syudad mao si Atty. Arman Clarin.
Pamahayag niini nga basi sa impormasyon nga naka-abot kaniya gikan sa iyahang mga tawong gipadala aron sa pagtambong sa maong panagpulong, gibutyag matud pa ni Atty. Clarin nga higayon nga ma-aprubahan ni Mayor Rivera ang multi-million nga kontrata, mu-resign na kini sa iyahang posisyon.
Dako usab ang pagtuo ni kagawad Lagare nga ang maong transaksyon ang hinungdan nganong nalangan ang pagsubmitar sa bersyon sa city legal office sa transportation code nga dugay na niyang gipaabot aron nga maaprubahan na sa hawanan sa konseho.
Nagpaabot man usab ug kadismaya ang nasangpit nga konsehal gumikan luyo sa pagpaningkamot sa mga opisyal sa dakbayan nga mahatagan ug solusyon ang problema sa transportasyon, adunay mga opsiyal nga adunay tinaguang interest.
Gisuwayan usab hawanan sa konseho nga ipatawag si Atty. Clarin atol sa Question and Answer portion, apan aduna matud pa kini importanteng lakaw rason nga dili kini makatambong.
