TACLOBAN CITY – Ginpasaka na an kaso nga robbery ngan grave coercion ha City Prosecutors Office kontra ha mga gintudlok ni Gov. Petilla nga board of directors ha LMWD.
Personal nga nagpasaka hin kaso hi City Appointed LMWD General Manager Pastor Homeres upod an ira mga abogado.
Ha nasabi nga kaso, gin-akusahan hi Chairman Teodoro de Veyra ngan 14 nga empleyado han LMWD hin robbery nga ginbuhat dida han umagahon han Pebrero 5, kun diin gin-aaligar 20 nga computer sets ngan mga dokumento an ginkuha tikang ha water district ha Nula-tula. Unom daw nga behikulo ngan wing van an sumakob ngan gumawas ha LMWD Nula-tula tipakadto ha Leyte Academic Center ha Palo.
Sumala kan Pastor Homeres, an robbery ngan gave coercion in apil ha criminal ngan administrative case nga igpapasaka nira kontra ha Leyte Directors nga hira de Veyra, Illuminado Lantajo, Aldin Surpia, Dr. Alice Blas ngan Teresa Montubig.
Mababaruan nga nagpasaka gihapon hin kaso nga Usurpation of Authority an LMWD Leyte directors kontra ha LMWD City directors nga hira Roberto Muñoz, lawyers Sharilee gaspay Mauro, Bautista Corpin Jr., ngan Jenny lyn Polistico Manibay, ngan Bernardita Valenzuela.
Gin-subpoena na ni prosecutor Lemue Modesto an city directors para bumaton han kaso nga ginpasaka ha ira.
