Ya revela el kumandante del Mando Policia Rehiyunal cay aqui na ciudad e Zamboanga ta entra el mga importao supply del drogsa staba na Malaysia que ta vende hasta na mga provincia y mga isla.
Na exclusivo entrevista del RMN Zamboanga con Chief Supt. Billy Beltran enantes aga, ele ya habla cay na Barangay Recodo ta entra el mga droga ilegal y ta destribuji coneste el mga drug pusher na diila mga parokyano na provincia de Basilan,Zamboanga Sibugay y Del Norte.
Si Beltran ya habla cay porcausa que se llama “transhipment point” el ciudad de Zamboanga,rason para aqui toma ventaja el mga drug dealers prinsipia mobiliza diila mga ilegal transaksyon.
Junto con el PDEA 9, ta revisa asegun sila aura con el diila mga stratehiya na campanya contra droga para por lumenos fuede neutraliza con el mga grande fescao que amo responsable coneste ilegal negosyo.- Bhong Simbajon/RMN News
