El Ciudad de Zamboanga hunto con el City Environment and Natural Resources Office o CENRO ay encabesa con el observacion del Earth Hour na Sabado, Marso 24, alas 7:30 del noche, na City Hall grounds onde tiene tambien preparao maga diferente actibidades antes el lights off eksakto alas 8:30 del noche.
La alcaldeza Beng Climaco-Salazar ya pirma un Orden Ejecutivo numero 356-2018 onde ay dale suporta el Ciudad na llamada del Earth Hour para dale accion con el conservacion de energia, accion para na climate change y otro pa maga actibidad.
El un hora actibidad ta observa el entero mundo, onde el maga ciudad y pueblo na diferentes lugar ta serra con el maga luz por un hora con el tema #Connect2Earth. Este para lleva y llama atencion con el maga vivientes para participa con el observacion paraber pwede ayuda salva con el biodiversity y dale accion con el climate change.
Por cuantos anyo ya ahora, el Ciudad de Zamboanga ta promete que suporta y participa con el llamada del Earth Hour Philippines que ta encabeza el Department of Energy (DOE) y el Worldwide Fund for Nature (WWF).
El Ciudad ay man switch-off con el cuantos maga streetlights, signage lights y luz na cuantos monumentos del Ciudad durante el actibidad.
(Photos by the city government)
