"CIUDAD DE ZAMBOANGA PREPARAO YA ENCASO PASA EL TYPHOON VINTA"

Preparao ya cuantos maga barangay aqui na ciudad de Zamboanga donde posible ay tupa el typhoon vinta. este ya bene despues anuncia el PAGASA cay para aqui na ciudad de Zamboanga el direction del typhhon desde Northern Mindanao donde entrao ya el Zamboanga Peninsula na signal number 2.
Base na advisory del PAGASA posible luego denoche o maniana madrogada ay pasa el typhoon aqui na ciudad que donde posible afecta el costa weste parte del ciudad..
Asegun con el hefe del CDRRMO City Disaster Risk Reduction Office Dr. Elmer Apolinaryo preparao ya el su opisina y personahes responde encaso chene barangay aqui na ciudad el afecta con el typhoon. Mismo el alcalde Beng Climaco Salazar ya convini ya con el maga consierne agencia del govierno local para asegura fronto responde encaso llega el calamidad.
Aqui na ciudad de Zamboanga el maga barangay posible afecta na typhoon amo aquel locao na maga coastal area como alyi na barangay Labuan na costa weste. El barangay capitan del Labuan Oning Maravilla ya habla aqui na RMN durante el entrevista na programa Straight to the point cay talya ya na diila barangay el maga las cosa nesesita encaso de emergencia, ya habla si Maravilla talya na na diila barangay on standbye maga coniserne personajes y maga equipo para usa encaso resulta na evacuasion, pero lingasa di Maravilla cay chene pa siempre maga residente na su barangay el duru cabesa y hende takre si manda evacua poreso porsao ele ay implementa el force evacuation si hende canila takre.
El barangay Labuan uno del maga barangay ta afecta na calamidad como typhoon del maga resiente lang monton del maga residentes ta esta na cantoy mar ya evacua porcaosa na storm surge.afuera el barangay Labuan na costa weste ta afecta tamen el barangay del Vitaly na costa este.