Davao City – Nanumpa na karong adlawa isip konsehal sa Third Congressional District si Brgy. Mulig Brgy. Capt. Carmelo Clarion sa sulod sa City Mayor’s Office.
Si Clarion ang nipuli kang kanhi 3rd district councilor Bernard Al-ag human kini nilingkod sa posisyon nga giluwatan ni Vice Mayor Pulong Duterte.
Kahinumdoman nga gibutyag ni Mayor Inday Sara Duterte Carpio nga angay ipuli sa 3rd district position mao ang usa ka barangay captain gumikan mas nakahibalo kini sa unsay tinuod nga kahimtang diha sa grass roots level.
Sa pakighinabi kang Clarion, nangayo kini og panahon nga sutaon kung unsa ang mga problema sulod sa ikatulong distrito aron mahibaw-an kung unsa ang angay iprayoridad.
Dugang sa bag-ong third district councilor, gitataw niini nga kung papilion siya og komitiba gusto niya sa Peace and Order Committee gumikan mas nahasa siya dinhi ug kahibalo unsaon pag-atiman bisan pa man og dako kini nga responsibilidad.
Gawas niini, bisan asa pa man nga komitiba siya ibutang mutrabaho sa gihapon ang kanhing kapitan.
RadyoMaN Jason Amisola
